ទំនាស់ពូប្រ៉ាវ នឹង ពូព្រូច និង ការប

ទំនាស់ពូប្រ៉ាវ នឹង ពូព្រូច និង ការបាត់កញ្ចក់ទិព្វផ្ទះមីងព្រួយ

ជាយូលង់ណាស់មកហើយមានគ្រសារពីរដែលរស់នៅក្នុងភូមិប្រេះឆាជាមួយគ្នា គ្រួសារទាំងពីរមិនដែលត្រូវគ្នាឡើយ តែងតែមានជម្លោះទាស់ទែងគ្នាជានិច្ច បើទោះជាមានពេលខ្លះមើលទៅដូចជាត្រូវគ្នាក៏ប៉ុន្តែធាតុពិតគឺគ្រាន់តែធ្វើដើម្បីផលប្រយោជន៏រៀងខ្លួនប៉ុណ្ណោះ។ គ្រួសារទាំងពីនោះគឺគ្រួសារ ពូប្រ៉ាវ និង គ្រួសារពូព្រូច ដោយគ្រួសារពូប្រ៉ាវ។ គ្រួសារពូប្រ៉ាវជាគ្រួសារធូធារមានទ្រព្យច្រើន និង មានអំណាចនៅក្នុងភូមិ ដែលធ្វើឲ្យមានមនុស្សជាច្រើនស្មគ្រ័បំរើ និង ធ្វើតាម។ រីឯគ្រួសារពូព្រូចវិញមិនសូវជាមានបានប៉ុន្មានទេ តែគ្រួសារនេះក៏គ្រាន់បើដែរព្រោះមានអ្នកភូមិជាច្រើិនរាប់អានដោយក្តីអាណិតអាសូដោយសារគ្រួសារពូព្រូចតែងតែចូលរួមជាមួយអ្នកភូមិប្រឆាំងការធ្វើបាបពីគ្រួសារ និងបក្សពួកពូប្រ៉ាវ។ ភូមិប្រេះឆានេះ មានវប្បធម៌ល្អមួយគឺតែងប្រារពពិធីបុណ្យធំមួយជាប្រចាំ ជាញឹកញាប់នៅពេលចប់បុណ្យគ្រួសារទាំងពីរនេះតែងតែឈ្លោះគ្នាដោយប្រកែកយកឈ្នះរៀងៗខ្លួនពីការប្រមូលបច្ច័យនៃពិធីបុណ្យ។ គ្រួសារពូព្រូចតែងចោទថា តាមពិតគ្រួសារគាត់ប្រមូលបានបច្ចួ័យច្រើនជាង ប៉ុន្តែគ្រួសារ ពូប្រ៉ាវបន្លំដោយដាក់បញ្ជូលលុយខ្លួនបន្ថែមក្នុងបច្ច័យ និងបានបានបន្លំពីអ្នកចូលមកគ្រួសារគាត់ខ្លះ។

បន្ទាប់ពីឈ្លោះគ្នាយា៉ងយូគ្រួសារទាំងពីបានសម្រុះសម្រួលត្រូវគ្នាបានមួយរយៈដោយមានការចូលរួមត្រេកអពីអ្នកភូមិ មិត្តឆ្ងាយជិតយា៉ងគក្រឹកគគ្រេង ប៉ុន្តែការបង្ហាញភាពស្នីទស្នាលក្លែងក្លាយនេះមិនមានអាយុវែងប៉ុន្មានឡើយ។

លើកនេះជំលោះធំមួយបានកើតឡើងនៅពេលដែលបុណ្យតូចធំបន្តបន្ទាប់គ្នាជិតចូលមកដល់។ បើតាមការនិយាយតតគ្នារបស់មនុស្សចេចចូចក្នុងភូមិនិយាយថា មកពីការរស់នៅមិនចុះសម្រុងគ្នា និង ខ្លះក៏ថា ពូប្រ៉ាវទំនងជាខ្លាចចាញ់គ្រួសារពូព្រូចក្នុងការប្រមូលបច្ច័យនៅពេលបុណ្យធំតូចខាងមុខដែលមកដល់ក្នុងពេលឆាប់ៗនេះ។ លើកនេះពូប្រ៉ាវលេងមែនទែនដោយគាត់ខឹងពូព្រូចយ៉ាងខ្លាំង ស្តីឲ្យខ្លាំង ដែលអ្នកចេចចូចថា ប្រហែលពូប្រ៉ាវបញ្ជាឲ្យគ្នាគាត់ស្ទាក់ចាំវៃ៉ពូព្រូច ដែលធ្វើឲ្យពូព្រូចលែងហ៊ានចូលភូមិ គឺទុកតែពូព្រេចឲ្យនៅភូមិមើលថែរទាំគ្រួសារ។ ក្នុងកំឡុងពេលនៃការគ្រប់គ្រងរបស់ពូព្រេច គ្រួសារពូព្រូចតែងរងការធ្វើបាបពីគ្រួសារពូប្រ៉ាវ មិនត្រឹមតែគ្រួសារគាត់ប៉ុណ្ណោះទេ លើកនេះគឺរាលដាលដល់មិតភក្តិរបស់ពូព្រូចមួយចំនួនទៀត ហើយចុងក្រោយរឿងក៏ធ្លាក់ដល់ពូព្រេច គាត់ភ័យខ្លាំងណាស់មិនហ៊ានចេញទៅណាទេ គឺសុខចិត្តសម្ងំនៅក្នុងផ្ទះ។ គួបញ្ជាក់ថា នៅពេលមានជម្លោះម្តងៗគ្រួសារពូព្រូចទទួលបានការឈឺឆ្អាលពីអ្នកជិតឆ្ងាយជាច្រើន ជាពិសេសការគាំទ្ររបស់អ្នកភូមិក៏កាន់តែច្រើន។ អ្នកភូមិ និង មនុស្ស ម្នាជិតឆ្ងាយមកគាំទ្រពូព្រេច និង លើកទឹកចិត្តគាត់ឲ្យតស៊ូតទៅទៀតកុំមានការភ័យខ្លាច។ អ្នកគាំទ្រនិយាយថា គាត់មិនគាំទ្របុគ្គលពូព្រេច ឬ ពូព្រូចទេ តែគាត់មិនចូលចិត្តពូប្រ៉ាវធ្វើអ្វីដោយមិនគោរពច្បាប់របស់ភូមិ ពោលគឺធ្វើតាមអំពើចិត្ត។ ការគាំទ្រ និង ការជជែកវែកញែករកខុសត្រូវរវាងគ្រួសារទាំងពីរនេះកាន់តែរីកធំទៅៗ កាន់តែឡើងកំដៅខ្លាំងទៅដែលធ្វើឲ្យគ្រួសារពូប្រ៉ាវខ្មាស់ផង ខឹងផង ជាមួយនឹងពាក្យចេចចូចរបស់អ្នកចេចចូច និង មិត្តភក្តិពូព្រូច ដូច្នេះពួកគាត់ប្រហែលជាត្រូវខំប្រឹងរិះរកវិធីលុបបំបាត់ការជជែកវែកញែក និង ធ្វើឲ្យអ្នកភូមិ និងអ្នកចេចចូច ព្រមទាំងគ្រួសារពូព្រូចភ្លេចគិតពីរឿងដែលកំពុងកើតឡើងទាំងឡាយ។

មិនយូប៉ុន្មានក៏មានរឿងហេតុភ្ញាក់ផ្អើលមួយបានកើតឡើង គឺរឿងការបាត់កញ្ចក់ទិព្វនៅផ្ទះមីងព្រួយ។ កញ្ចក់ទិព្វផ្ទះមីងព្រួយនេះ ត្រូវបានអ្នកភូមិផងរបងជាមួយ និង អ្នកដែលបានមកឃើញ ឬ លឺដំណឹងស្ងើចសរសើយ៉ាងខ្លាំង ព្រោះកញ្ចក់ទិព្វនេះមានរស្មីភ្លឺជិញ្ចាចដែលអាចសឆ្លុះបញ្ចាំងពីរឿងពិតជាច្រើន។ ជារឿយៗកញ្ចកទិព្វតែងតែឆ្លុះបញ្ចាំងពីរឿងផ្សេងៗជាច្រើនដែលធ្វើឲ្យប៉ះពាល់ដល់ផលប្រយោជន៍ និង កេរ្ត៍ឈ្មោះមនុស្សជាច្រើន ហើយមានពេលមួយនោះកញ្ចក់ទិព្វបានប៉ះពាល់ដល់ពូប្រ៉ាវដែលធ្វើឲ្យពូប្រ៉ាវខឹងយ៉ាងខ្លាំងផងដែរ។ ការបាត់កញ្ចក់ទិព្វធ្វើឲ្យមនុស្សម្នាផ្អើល ឆោឡោរយ៉ាងខ្លាំង ហើយមនុស្សម្នាជិតឆ្ងាយ រូមទាំងអ្នកភូមិក៏នាំគ្នាមកផ្ទះមីងព្រួយអស់ដោយសឹងតែគ្មានអ្នកណាម្នាក់ចាប់អារម្មណ៍ពីរឿងជម្លោះរវាងគ្រួសារពូប្រ៉ាវ និង គ្រួសារពូព្រូចទៀតឡើយ រីឯរឿងពូព្រេចក៏ចាប់ផ្តើមស្ងប់ស្ងាត់ទៅតាមនោះដែរ សូម្បីតែគ្រួសារពូព្រូចក៏លែងនិយាយពីបញ្ហាខ្លួនឯងដែរ ប្រហែលជាភ្លេចគិតហើយមើលទៅ។

ខ្ញុំបានមើលរឿងនេះត្រឹមប៉ុណ្ណឹង អញ្ជឹងមិនដឹងថា រឿងការបាត់កញ្ចក់ទិព្វផ្ទះមីងព្រួយ វាមានការទាក់ទងជាមួយជម្លោះដ៏ក្តៅគគុករវាងគ្រួសារពូប្រ៉ាវ និង គ្រួសារពូព្រូចដែលឬទេ សូមជួយផ្តល់គំនិតផង។

និពន្ធដោយ៖ អ្នកវិភាគតាមភូមិ